ඈ සොයමින්...

ගුරුවරියකට ආදරය කල උසස් පෙළ සිසුවකු ඇය හදිසියේ මියයාම නිසා ශෝකයට පත්ව ලියූ කවියක්

හර බැරට ජීවිතේ ගලපන

අරුමයක රඟ කිය කියා

දිසාපාමොක් පරපුරින් ආ

සුන්දරිය කෝ කොහි ගියා...

පොත් මිටිය තුරුලට අරං ඇය

එනතුරා මඟ බල බලා

එවක මතකය සිහිවෙලා අද

දැස කඳුලින් බර වෙලා...

අගේ රුව ගැන ලියූ කවි පද

පොත් අගින් හමුවූ එදා

කිසිත් නොකියම හිනැහුනා ඈ

නෙත් කොනින් මා දෙස බලා...

දෙව්ලොවින් බට සුරඟනක් දෝ

සොඳුරු හැඟුමන් සිත තියා

ආල සිත අද තනිවෙලා ඈ

දෙව්ලොවින් අරගෙන ගියා...

සොඳුරු රුව ගැන ඈත දවසක

කවියකට පද ගැලපිලා...

කෙසේ ලියම්ද කවක් අද මම

නොයෙන ගමනක් ගැන කියා...